Битката за Центар влегува во завршна фаза – двајца кандидати се борат за една од најурабните општини во Македонија. Центар, со години наназад важи за политички симбол – место каде што секој избор носи пошироко значење од локалното. И токму затоа вниманието е големо – и битката е повеќе од лична. Се судираат две различни визии, два различни пристапи – и двајца кандидати со јасна амбиција да го водат Центар.
Горан Герасимовски, актуелниот градоначалник и кандидат на СДСМ – кој почетокот на вториот дел од изборната камапња го искористи да испрати порака дека има одлична програма, којашто била пишувана заедно со граѓаните, за разлика од некои против кандидати кои ги имале копирано проектите од програмата. Герасимовски вели дека периодов интензивно работи на чистење на општината и ги повика граѓаните да излезат на гласање во вториот круг, да му дадат доверба за втор мандат.
Од другата страна, Мирослав Лабудовиќ од движењето ЗНАМ, го интензивира настапот нудејќи мерки, насочени кон младите и дигиталната писменост. Нуди помош од општината доколку стане прв човек на Центар, за учениците да можат да ги купат лаптоп или таблет. Со оваа мерка, Центар може да стане пример како локалната власт директно ја поддржува иднината“, рече тој.
И Лабудовиќ ги охрабрува граѓаните да гласаат на вториот кург и да изберат промена. Инаку во првиот круг од изборите во општина Центар, излезноста изнесуваше 50,66% – односно 22.347 гласачи од вкупно 44.109 запишани. Најмногу гласови освои Герасимовски – 8.535 гласа (38,19%), втор е Лабудовиќ со 5.707 гласа (25,54%). Третопласирана е независната кандидатка Биљана Ивановска, со 4.465 гласа (19,98%), а зад неа е Марја Среброва од Левица со 2.121 глас (9,49%). Тоа значи дека околу 30% од гласачите во првиот круг избрале опција различна од финалистите – и токму тие ќе бидат клучот во вториот круг.
Вториот круг ќе одлучи – дали Центар ќе продолжи со Герасимовски или ќе му даде шанса на Лабудовиќ.
Наспроти досегашниот политички континуитет, се појавува опција што ветува нова перспектива, а конечниот збор го имаат граѓаните.
