Претседателот на Социјалдемократскиот сојуз на Македонија, д-р Венко Филипче, денеска во Брисел, учествуваше и на состанокот на Партијата на европските социјалисти (ПЕС) пред Европскиот совет, на кој што присуствуваше претседателот на Европскиот Совет Антонио Кошта и лидерите на социјалдемократските и прогресивните партии од регионот и Европа.
По средбата претседателот Филипче даде изјава за медиуми, која ја пренесуваме интегрално:
Почитувани граѓани, Ви се обраќам од Брисел, затоа што борбата за слободата и демократијата во Македонија бараат акција и заедничко дејствување.
Донесената срамна Резолуција на ДПМНЕ и ЗНАМ во Собранието е директен удар врз демократијата, слободата на говор, мислењето и политичкото дејствување.
Кога парламент носи неуставна резолуција, против опозицијата, тогаш државата престанува да биде демократска и влегува во авторитаризам. Во режим. Власта сака да ја замолчи и да ја забрани работата на опозицијата, да создаде еднопартиска држава и да ја згасне слободата на говор.
СДСМ тоа нема да го дозволи, ќе ја одбраниме слободата и демократијата. Овде, во Брисел, ќе побарам поддршка од цела Европа, од сите прогресивни и демократски сили, од сестринските социјалистички и социјалдемократски партии.
Македонија мора да биде слободна, демократска и европска држава. Време е за формирање единствен граѓански фронт – фронт за правда, слобода и демократијата.
Фронт во кој сите, без разлика на партиска, етничка или идеолошка припадност, ќе застанеме како еден во одбрана на демократијата, слободата на говорот и мислењето, и во одбрана на Македонија.
Да ја одбраниме Македонија. Да ја одбраниме демократијата!
