Фудбалската федерација на Македонија (ФФМ) веќе започна процес за имплементација на ВАР системот во македонскиот фудбал, што ќе претставува важен чекор во модернизацијата на Првата македонска фудбалска лига (ПМФЛ).
Во рамки на постапката, ФФМ веќе добила понуди од компании специјализирани за ВАР технологија и во моментот се наоѓа во фаза на евалуација и избор на најсоодветниот понудувач.
Процесот се спроведува во тесна координација со ФИФА и УЕФА, во согласност со сите меѓународни стандарди за имплементација и користење на ВАР системот.
„Сме уверени дека имплементацијата на ВАР системот ќе донесе поголема транспарентност и квалитет во организирањето на натпреварите. Овој проект е значаен чекор за нашата лига, бидејќи со него не само што им се обезбедува поддршка на судиите, туку и се создаваат услови за подобро функционирање на клубовите, во насока на подобрување на инфраструктурата на стадионите и исполнување на барањата за поставување платформи за ТВ камери, што е неопходно за имплементација на ВАР“, изјави Дејан Јакимовски, проектен лидер за имплементација на ВАР.
Како дел од процесот, ФФМ проектниот тим редовно одржува работни сесии со ФИФА. Последната сесија се фокусираше на програмата за асистенција и одобрување на имплементацијата (IAAP) и споделување на најдобрите практики за ВАР имплементации. Темите што беа опфатени се однесуваа на технолошката инфраструктура, логистиката потребна за системот, како и обуката и развојот на судиите за работа со ВАР, според глобалните стандарди на ФИФА.
Тоа значи дека од следната натпреварувачка сезона, ВАР ќе биде дел од натпреварите во Првата МФЛ.
ФФМ продолжува да се посветува на унапредување на фудбалската инфраструктура и создавање услови за фер и еднаков третман на клубовите.
