Владината „Есенска кошничка„ и во бројки докажа дека има резултати. Синдикалната кошничка месецов, за прв пат по подолго време е намалена.
Нејзината вредност за месец октомври 2024 година изнесува 61.249 денари, информираат од Сојузот на синдикати на Македонија. Со изнајмен стан од 60 метри квадратни за октомври кошницата изнесува 76.624,00 денари. Споредено со вредноста на синдикалната минимална кошница за септември 2024 година таа е во просек е намалена за 57,00 денари, но по дејности најголемо намалување има кај храната од дури 935 денари.
„Значајно е да се нагласи дека мерката на Владата за ограничување на висината на маржите даде дел од посакуваниот резултат, но, поради алчноста за профит кај трговците што државата мора да го заузда, тие, кога разбраа за намерата на Владата за оваа мерка ги зголемија цените на сите производи„ –велат од ССМ.
Според нив, ова потврдува дека цените треба уште да се намалуваат, а нивното зголемување нема никаква поврзаност со економската логика, ниту пак со здравиот разум, туку, како што велат, има поврзаност само со алчноста која е се поизразена во Македонија. Од ССМ сметаат дека при креирањето на мерките Владата треба да го вклучи синдикатот за тие да бидат подобри, имајќи предвид дека во последната мерка 47 категории на производи од 70, беа превземени од синдикалната минимална кошница која ја подготвува ССМ.
