Сите граѓани се еднакви пред Уставот и законите, па зошто да се толерираат оние кои не ги плаќале долговите навреме, коментира дел од правната фела откако Уставен пресече – нема застарување на извршувањето на долгови, коишто претходно согласно последните измени на Законот за облигациони односи требаше да застаруваат за 10 години.
Во однос на ланските измени на законот со кои каматата не може да го надмине долгот, адвокатот Александар Тумановски вели дека се исправни, но во однос на застарувањето на долговите појаснува дека Уставен е во право бидејќи на тој начин се обезбедува економска и правна сигурност на доверителите.
Потегот на Уставен го осудија здруженијата по чија иницијатива беше изменет Законот за облигациони односи. Велат одлуката е на штета на илајдници граѓани, а очекуваат реакција од Владата и Собранието.
Тие уште минатата недела ги повикаа судиите да не дозволат повторно извршувањата да не застаруваат и истакнаа дека е сомнително тоа што Уставниот суд еднаш не поведе, а потоа го оспори истиот закон.
Според брифирањето на уставните судии, тие воопшто не се занимавале со роковите. За судот спорно било што законот почнал да важи веднаш, па доверителите немале време да се прилагодат. Забележуваат и на ретроактивноста на законот со што ги застарело веќе почнатите постапки за извршување.
Од Уставен велат дека Собранието може веднаш да донесе нова одлука, но како што велат, треба да внимава на рокот во кој ќе почне примената на законот, но и да води сметка за рамноправност на должникот и доверителот.
Здруженијата на граѓани пак се сомневаат дека зад одлуката на Уставен стојат интереси на големи компании кои бараат наплата на заостанат долг.
