Буџетот за следната година е скроен врз реални проекции – сметаат економистите. Според нив, остварлив е економски раст од 3,8% и намалување на инфлацијата до 2 и пол отсто. Освен тоа, го поздравуваат потегот на Владата која се обврза да го продолжи процесот на умерено трошење и намалување на несуштинските расходи. Тие сметаат дека Министерството за финансии било претпазливо при кроењето на државната каса и ги имало в предвид економските ризици кои доаѓаат од санкциите кон Русија и геополитичките тензии. Затоа задолжувањето било исклучиво за враќање на стари долгови и за покривање на дефицитот, кој исто така се намалува споредено со 2025-та година.
Главен двигател на растот предвидено е да бидат капиталните и приватните инвестиции, како и зголемената потрошувачка поради повисоките плати и пензии. Фактот што капиталните инвестиции се намалени до нивото на 660 милиони евра, според универзитетскиот професор Синиша Наумоски е доказ дека тие се проектирани на реално ниво, односно дека толкав е капацитетот и навистина да се реализираат, а не само да завршат напишани на хартија. Поголем дел од парите ќе се потрошат за автопатите што ги градат Бехтел и Енка, за други инфраструктурни проекти, како и за инвестиции во одбраната согласно барањата на НАТО.
Повеќе пари ќе има и за исплата на пензии. За оваа намена вкупно ќе се потрошат 1,9 милијарди евра, или за речиси 10% повеќе. Највозрасната категорија граѓани во три наврати доби покачување од вкупно 6.000 денари во последната година и пол. За март 2026-та е предвидено зголемување од 1.000 денари. Уште едно покачување на примањата ќе имаат и следната есен, но се уште не се знае дали тоа ќе биде линеарно.
