Канцер не се лечи со парацетамол, па со реформи да го средиме судството. Добро упатените во функционирањето на судскиот систем во државава коментираат дека Судскиот и Обвинителскиот совет се метастазирани и не постои можност за реформи со истите луѓе кои ја сведоа довербата на граѓаните на 2 %. Адвокатот Сашко Дуковски години наназад цврсто стои на ставот дека овие два совета се дувло на корупција и треба веднаш да се укинат, а не да се реформираат.
Последниот скандал со членовите на Судски и Обвинителски совет и нивниот упад во Управниот одбор на Академијата ја покажува само нивната желба за личен интерес и ништо повеќе, коментира адвокатот. Тој појаснува дека постојано истите луѓе се изјаснуваат дека се за владеење на правото и почитување на законите, а всушност преку функциите само си завршуваат работи за нив, и нивните блиски. Покрај тоа што членовите на советите седнаа и во Управниот одбор на Академијата, Дуковски потсетува на како што вели срамниот обид на поранешната директорка на академиијата, за време на избори да протне кандидати.
Судир на интереси, непотизам, корупција. Години наназад судскиот систем тоне, а довербата на народот е сведена на само 2 %. Меѓународната заедница повикува на реформи во правосудството и имплементација на извештајот на Оценската мисија што влезе во Судскиот совет по скандалите што го тресеа со месеци.
Засега извештајот и препораките за реформи на Оценската мисија не и се познати на јавноста.
Апелите од претставниците на Европската унија во земјава очигледно не допираат до челниците во судството. И покрај предупредувањата и апелите, Антикорупциска пред два дена регистрираше судир на интереси кај членови на Судскиот и Обвинителскиот совет.