Поранешниот генерален секретар на Владата предводена од Зоран Заев, Драги Рашковски, на граничниот премин Ново Село, влегувајќи од Бугарија во Македонија, е фатен со 20.000 евра кеш кои, како што дознава Алфа, претходно не ги пријавил на царина.
Како што предвидува законот, поголемиот дел од парите му се запленети и ќе му биде поднесена соодветна пријава. Дел од медиумите објавија дека Рашковски со парите бил фатен на границата со Грција.
Драги Рашковски на својот профил на Фејсбук демантира дека бил задржан на граница во обид да изнесе 20.000 евра од Македонија во Грција:
„Во врска со некои натписи на медиумите дека сум задржан на граница со Грција, се апсолутна невистина. Станува збор за легално пријавени средства на царинскиот службеник, со извод од банка, кои се внесуваат во државата, а не се изнесуваат. Ве молам како медиуми да не ширите невистини“, напиша Рашковски.
Кривичниот суд на 6 јули 2023 донесе пресуда за случајот „Софтвери“, во кој првообвинет беше токму Рашковски. Тој беше осуден на казна затвор од осум години за спорни тендери, набавка на софтвери и исплата на хонорари. За злоупотреба на службената положба е осуден на седум години затвор, а за делото перење пари – една година и шест месеци затвор.
По измените на Кривичниот законик, Рашковски се жалеше на апелација, пресудата од осум години падна, па сега е вратена на повторно судење.
