Обвинителството да престане со селективноста и конечно да почне ажурно да ги гони сите кои се огрешени пред правдата. По апелот на премиерот Мицкоски и правната фела коментира дека јавноста повеќе не смее да биде сведок на апсурди во коио обвинителството за едни е мајка а други маќеа…Адвокатите Сашко Дуковски и Јанаки Митровски сметаат дека легитимно е, не само премиерот туку и граѓаните да очекуваат од обвинителството да покаже активна борба со високата корупција.
Сметам дека Обвинителството треба да се однесува исто против секое лице кое покренува постапка, поголемем проблем од пасивноста е селективноста во постапувањето. За некои е мајка, за други маќеа. Да запираш постапки, а други да гониш со години за тривијални работи, вели Дуковски.
Сите очекуваме посериозна борба со високaта корупција, за обични смртници одлично си ја работат работата, но за капиталци не е така, тие одлично пливаат во системот, вели Митровски.
Критиките на опозицијата и дел од јавноста дека премиерот недозволено се мешал во работата на обвинителството според Дуковски е став на дежурни критизери на власта, кои критикуваат само кога се во опозиција. Според него, легитимно право е премиерот да бара институциите ажурно да си ја вршат работата.
„Нив секогаш им смета кога се во опозиција. Зошто прмиерот не смеел да повикува на ажурност? Има легитимно право како прв човек на владата и како граѓанин има право да повикува на поажурно постапување“, вели Дуковси.
Адвокатот Митровски вели дека народот е навикнат на политички влијанија врз судството и тоа е причината за негативните коментари. Но, тој е убеден дека премиерот има информации за чување на предмети во фиоки, кои не се однесуваат за обичните смртници.
Легитимно е да се очекува поажурна работа на институциите, но не е легитимно да се создава чувство дека ќе се отвораат истраги, бидејќи тоа може да имплицира притисок и мешање во судската власт. Сите очекуваме посериозна борба со високата корупција, додека за обични случаи системот функционира одлично, но кај „капиталците“ често се создава впечаток дека полесно „пливаат“ низ системот. За едни се бара куќен притвор, за други – обични смртници – тоа речиси никогаш не се случува. Легитимно е извршната власт да очекува институциите да си ја вршат работата, како и да обезбеди услови за нивно функционирање, со оглед дека често се соочуваат со недостиг на кадар и ресурси, вели Митровски.
И адвокатот Димитар Дангов е на иста линија. И тој вели дека премиерот има легитимно право да го повикува обвинителството да си ја работи работата.
Неговата порака, упатува на легитимен повик за вршење на надлежноста од страна на обвинителството која е востановена, токму за заштита и одржување на законитоста на правниот поредок, вели адвокат Димитар Дангов.
Правниците се прецизни. Тенка е линијата меѓу легитимното барање за поажурно и поефикасно работење на обвинителството и евентуалниот притисок или мешање на извршната власт врз независноста на правосудните институции.Според нив и ова е една од причините за различното толкување на пораката за Обвинителството.
