Во Музејот на Град Скопје, на Летната тераса, вечерва со почеток во 19:30 часот ќе биде одбележан Меѓународниот ден на младите – 12 Август, при што ќе бидат доделени награди за младинско учество.
Наградите ќе се доделат во три категории: „Младински организации, организации за млади и чадор младински организации“, „Неформални групи на млади“ и „Млади и безбедност“. Ќе биде доделена и Награда за партнери на младите во категоријата „Службеник за млади“.
Настанот го организираат Министерството за социјална политика, демографија и млади, Националниот младински совет на Македонија, Мисијата на ОБСЕ во Скопје и Програмата за развој на Обединетите нации (УНДП).
Како што информираат од Министерството, настанот претставува можност да се истакнат достигнувањата на младите, да им се оддаде признание на оние кои со својата визија, посветеност и активизам придонесуваат кон развојот на своите заедници, како и да се истакнат институциите, организациите и поединците кои континуирано работат на создавање можности за активно младинско учество.
На настанот поздравни обраќања ќе имаат министерот за социјална политика, демографија и млади Ѓоко Велковски, претседателката на Националниот младински совет на Македонија Ивона Кузмановска, заменик шефот на Мисијата на ОБСЕ во Скопје Сузан Пенкса и заменичката на постојаниот претставник на УНДП Ана Чернишова.
