Ниту отварање на граничниот премин Маркова нога, ниту железничко поврзување на Дојранскиот регион со Солун, додека во Македонија граѓаните се во хаос со „северните“ документи, Грците мува не ги лази што ништо не исполниле од Преспанскиот договор. Грција досега требаше да ги испорача и ратификува три меморандуми коишто бил дел од договорот со Македонија.
ТЕЛОП:
Преспански Договор
Член 14
Страните ќе настојуваат да ги подобрат и модернизираат постоечките гранични премини, како што тоа го бара протокот на сообраќај, а исто така ќе градат и нови гранични премини, со цел да се поттикне туристичката и трговска размена меѓу нив.
Грците немаат ништо направено од тоа што ветиле откако удрија параф на Преспанскиот договор. Пред 5 години се најавуваше дека граничниот премин Маркова нога ќе биде отворен најдоцна до крајот на 2023, но ништо од тоа. Ова ветување го дадоа поранешните премиери на Грција и Македонија, Ципрас и Заев.
Повеќе од половина век, жителите на Преспа чекаат да се дигне старата рампа за да заживее туризмот и во овој регион, но попусто.
Грците ветија и железничко поврзување на Дојран со Дојрани, но ништо и од тоа. Македонското стопанство трпи, но за овие 5 години никој од власта не го покрена ова прашање, ниту им побара на Грците да го испорачаат она што ветиле во насока на подобрување на економската соработка.
Таблите Евзони на влезот на Грција како и натписите ФИРОМ или Скопиа наместо новото име на Македонија со географската одредница, се уште се непоместени.
Ама за пасошите експресно пристигна грчкото „Охи“. Пред две недлели, Атина порача дека не само што нема да попушти околу роковите за имплементирање на Преспанскиот договор, туку и ќе инсистира нивно доследно почитување. Како за пасошите со додавката „Северна“, така и со регистарските таблички со додавкат НМК.
За разлика од нив, нашите власти одамна брусеа шахти и натписи од време на античката историја, формираа комисии, менуваа учебници, а сега како јаготката на шлагот е хаосот со личните документи за кои граѓаните ќе плаќаат казни доколку не им се со новото име на државата.
