Скопското јавно обвинителство нема оформено предмет за автобусот со број 58 кој целосно изгоре во скопско Сопиште. Оттаму ги повикаа службите кои го воделе случајот доколку утврдат дека станува збор за саботажа, како што се сомнева директорот на ЈСП Кушовски, да го известат обвинителството, за да можат да постапат.
„До овој момент до Основното јавно обвинителство Скопје не е доставено известување за настанот. Службите и вештите лица кои постапувале на терен, доколку утврдиле дека има сомнеж за сторено кривично дело или намерна саботажа на автобусите, имаат обврска за тоа да го известат обвинителството, кое веднаш ќе постапи согласно своите надлежности,, потврдија од обвинителството.
Претходно, директорот на ЈСП, Драги Кушовски, за медиумите изјави дека претпријатието веќе има одредени сознанија во врска со пожарите во нивните автобуси, и ја отвори можноста дека се вршела саботаж на возилата на јавното сообраќајно претпиријатие.
Синдикатот на ЈСП реагираше на изјавата на кушевски барајќи од него да се извини за искажаните сомнежи за саботажа на автобусите. Оттаму побараа одговорност оти секојдневието на возачите станува се постресно. Бараат детална истрага и надлежните органи да реагираат за во иднина да не се повторат вакви незгоди.
„Некое возило не влече, во некои нема парно на ладно време, за некои автобуси нема делови и затоа возачите ги враќаат назад во гаражите. За 58-те буквално немаше исправни автобуси да возат. И другите возила не се безбедни. Директорот подобро да им се извини на луѓето за изјавата за саботажа Нека се извини подобро, а експертите да испитаат што е причината за пожарот“, рече Меџит Идризи, генерален секретар на СПАЈС.
Инаку, за шест месеци се запалија четири автобуси на ЈСП, додека извештаите на претпријатието покажале дека возилата не биле редовно сервисирани, а дури и за наједноставните процедури како што се промена на антифриз се барало одобрение од директорот.
