Дизелот поевтинува за 2,5 денари, а бензините поскапуваат за 2 денари по литар. Намалување од 1 денар има кај екстра лесното масло за домаќинство, додека мазутот бележи благо зголемување. Новите максимални цени кои ги определува Регулаторната кмисија за енергетика почнуваат да важат од полноќ. 95-ката ќе се продава за 82,50 денари по литар. Новата цена на 98-цата изнесува 84,50 денари по литар. Дизелот, пак, од утре ќе се продава за 91,5 денари по литар. Од овие цени може да се оди и надолу на бензинските пумпи поради попустот на ОКТА од 3 денари за дизелот, односно 2 денари по литар за бензините.
ЦЕНИ НА НАФТЕНИ ДЕРИВАТИ 28.04.2026
ЕУРОСУПЕР 95 82,50 (денари/литар)
ЕУРОСУПЕР 98 84,50 (денари/литар)
ЕУРОДИЗЕЛ 91,50 (денари/литар)
Екстра лесно масло 96 (денари/литар)
Мазут 46,656 (денари/килограм)
Владата смета дека не избрзала со тоа што ја укина мерката кај дизелот за враќање на ДДВ-то од 10% на 18%. Доказ за тоа е фактот што тој поевтинува од утре за два и пшол денари за литар. Според премиерот Мицкоски, земјава се уште има најевтини горива во регионот, па и покрај зголемената потрошувачка на македонските бензински пумпи од страна на странски државјани, нема да се ограничува точењето на нафтени деривати.
„Се уште со керозин снабдуваме неколку од регионалните аеродроми и не размислуваме како Влада да воведеме забрана за извоз или реекспорт на нафта и нафтени деривати и не размислуваме како Влада да ги ограничиме нашите бензински пумпи да точат гориво само на автомобили и друг тип на друмски возила со македонски регистерски таблички. Напротив сакаме да покажеме солидарност кон регионот, но и да покажеме дека Македонија е фактор на стабилност во регионот“ – вели Христијан Мицкоски – претседател на Влада.
Бизнисот претпазлив. Од Стопанската комора на Македонија велат дека многу фирми се жалат на растечкиот притисок и дека трошоците им растат. Тие ќе побараат мерки за помош на стопанството. Сметаат дека тие треба да бидат таргетирани и дека фокусот треба да се стави на извозниците кои имаат зголемени трошоци за транспорт и складирање.
Стопанството се подготвува за високи цени на нафтените деривати. Последните проценки на меѓународните финансиски институции се дека цената на нафтата на светските берзи нема д ападне под 90 долари за барел дио крајот на годинава. Тоа за нив значи високи трошоци за енергија на среден рок и очекувања за зголемување на инфлацијата.
