Во пресрет на одбележување на 35 години независна Македонија се разви полемика, партиски расправи и пресметки за тоа, чија е заслугата или кој ги оспорува фактите на процесот на градење на современа македонска држава, се наведува во соопштението од Демократски сојуз.
Гледано од денешна перспектива, во деведесеттите години актуелните водства на повеќето политички партии имаа многу малку или воопшто немаа никакво влијание во процесите на осамостојување на државата.
Тешкиот пат и товарот на раздвојување на Македонија од Југославија го понесоа тие што не се сликаа на бината на Градскиот плоштад во Скопје, туку со стратегија, планови и оружје, успеаја да се спротивстават на ЈНА и да ги удрат темелите на државата.
Беше тешко да се борите против водство на државата кое дел беше да се остане со Србија, преку наводна скратена Југославија, а дел тајно работеше Македонија да се приклучи кон Бугарија.
Македонците заедно со сите други граѓани и покрај опструкциите на референдумот за независност, цврсто и јасно ја искажаа вековната определба за самостојна и независна Македонија.
Сакаме да им честитаме на сите граѓани, но и на сите полицајци, оперативци, старешини и водството на Министерството за внатрешни работи, како и на припадници на армијата, кои направија сѐ процесот на осамостојување да се одвива брзо и да се заврши со историски успех.
Во ова време, на Македонија очајнички ѝ треба единство, а не поделби.
Затоа повикуваме на натпревар со идеи и конкретни дела за современа европска Македонија.
