Дрвокрадци кои препродаваат дрвја од уништени шуми, како и луѓе коишто сакаат да изградат дивоградби во заштитени предели, се можни предизвикувачи на пожарите во шумските предели.
Експертите предурпедуваат дека не се само излетите и скарите на излетничките места, или земјоделците кои ги палат стрништата, туку можеби станува збор и за добро смислен план за нелегална продажба на дрвја.
Пензионираниот командир на пожарникарна бригада од Битола, Костадин Поповски вели дека најчесто човекот го предизвикува пожарот, но високите температури и топлиот воздух ги шират огнените јазици вон контрола.
Виновници може да бидат и селаните, кои самите си ги палат губриштата на нивите, па потоа пријавуваат дека случајно се појавил пожар, вели Горан Стојаноски од Центар за управување со кризи.
“На ваков начин вие да дојдете да запалите ќибрит и да фрлите и да кажете дека пожарот се случил таму и таму, а вас ви е интерес нивата со тресетот и остатокот од житната култура да ви биде подредена, е тогаш тоа е нонсенс тоа е за казнување”-вели Стојаноски
Полицијата веќе расчистува неколку случаи на осомничени за намерно предизвикување на пожари. Иако на сила е забрана за движење во шума, од МВР апелираат до граѓаните да бидат внимателни со фрлање на отпушоци и отпадоци. Од МВР информираат дека е засилена контролата на терен.
Пожари со денови дивеат на планината Серта. Таму пожарникарите, припадниците на Армијата и на полицијата, како и ловџии се обидуваат да го изгаснат пожарот. Според познавачите, доколку од 24 до 48 часа не се стави контрола врз пламенот, тешко дека во наредните денови ќе може целосно да се изгасне.
