Дел од вработените во пет министерства, од денеска до петок ќе штрајкуваат по половина час. Тие денеска се собраа на протест пред Министерството за животна средина, од каде побараа од Владата да ги прифати нивните барања за потпишување колективни договори и зголемување на платите за 30 проценти. На протест излегоа дел од вработените во министерство за култура, животна средина, дигитална трансформација, транспорт и врски, економија и труд, како и вработените од Државниот завод за статистика и во државниот Архив. Претседателот на УПОЗ објасни дека ваквото барање стои на маса повеќе години, но ниту една влада до сега немала разбирање.
„Почнуваме денеска бидејќи се одржува седница на Владата и апелираме на денешната владина седница да се стави точка на дневен ред, со што ќе се изнајде начин да се обезбедат средства од буџетот за решавање на овој долгогодишен проблем на вработените“.
Синдикалците немаа одговор на прашањето зошто излегуваат на протест пред воопшто да се обидат да разговараат со владата, ниту како би се извело покачувањето кое воопшто не е предвидено со колективниот договор, а не е планирано ни со буџетот.
„Просечната плата во овие институции е околу 29.000,00 денари, а просечната плата исплатена на ниво на држава изнесува 42.124,00 денари. Додатокот што го бараме од 30 отсто значи дека вработените би добиле 6.000 денари зголемување на плата, но и покрај тоа, сите вработени повторно ќе бидат под просечната плата на државата“.
Барањето за зголемување на платите не е предвидено ниту со закон ниту со колективен договор што според експертите претставува директна форма на притисок врз институциите за решение на надвор од правните рамки. Иако Владата неодамна ги зголеми платите на просветните работници, докторите и здравствениот персонал, синдикатите сега бараат повисоки плати за администрацијата во Министерствата. Дополнително јавноста критикува дека синдикалните лидери кои примаат плати над 1000 евра со дополнителни привилегии, се однесуваат како монарси што го намалува кредибилитетот на нивните барања.
Љубиша Владимиров
