Фијаското со законот за амнестија на Кренар Лога не е ништо друго, туку само параван за лесното носење измени на Кривичниот законик со кој идните функционери нема никогаш да влезат во затвор за крадење на народни пари, а поранешните, се ослободија од кривична одговорност во предмети на организиран криминал. Со оглед на тоа што амнестијата не помина, а измените на КЗ како алва пројдоа во Парламентот – министерот Лога на прашање на Алфа, дали се чувствува изиграно, е дециден:
Изиграни се граѓаните, не јас!, вели за Алфа, министерот Кренар Лога.
Истовремено, Лога ја туркаше амнестијата, а неговата заменичка Мандиќ измените на КЗ, додека на јавноста и се „продаваше“ тезата за растеретување на пренатрупаните затвори и директивите на ЕУ за кривичниот систем.
Лошите услови и полните затвори, главниот адут на Лога во борбата за амнестија, не помина кај владејачкото мнозинство, а ослободувањето од одговорност на имиња од политичката сцена помина брзо и лесно кај пратениците.
Лога вчера тврдеше дека неизгласаната амнестија е одмазда на власта, бидејќи неговата партија Алијанса за Албанците не ги подржале измените на КЗ.
Но, факт е дека на власта не и беа потребни 8те гласа на Алијансата од каде доаѓа Лога за да си ги изгласаат измените, туку обратно, нему му беа потребни гласовите на владејачкото мнозинство СДСМ и ДУИ за да помине амнестијата.
Инаку, амнестијата не ги опфаќа осудените за 27 април, а ги опфаќа помагачите осудени на доживотен затвор за злосторството кај Смилковско езеро, од пред десетина години. Овој факт е доволен показател дека законот за амнестија, па и оној за измените на кЗ, се кроеле зад затворени партиски врати.
Кренар Лога е упорен и најави втор обид за законот за амнестија. Каква иднина ја чека неуспешната амнестија, зависи од евентуален политички концензус од страна на сите засегнати страни.
