Претседателката Гордана Сиљановска-Давкова упати честитка по повод 22 ноември – Денот на албанската азбука, во која ја истакна важноста на албанскиот јазик и неговата улога во зајакнување на социјалната кохезија и колективниот идентитет.
Пред 117 години унифицираната азбука го започна своето патување од Конгресот во Битола како најважен комуникациски код на еден народ. Денес се потсетуваме дека јазикот и писмото се темелни вредности кои го обликуваат колективниот идентитет и ја зајакнуваат духовната поврзаност меѓу генерациите.
На овој празник се изразува признание за континуираниот придонес во развојот на образованието и културата во општествениот живот, со кој се збогатува нашата заедница.
Честит нека ни е Денот на албанската азбука! Продолжуваме заеднички да ја градиме државата во духот на почит, еднаквост и единство, порача претседателката на државата.
