Викенд без вода во Скопје. Од вечерва пред полноќ „Водовод“ ќе прекине со водоснабдувањето во поголем дел од општините во главниот град. Ќе се работи на дефектот на градскиот цековод, а вода ќе имаат само населбите од левата страна на Вардар.
„Вечерва во 22 часот ќе почне санацијата на големиот дефект. Главната цевка од водовод ќе биде затворена од локацијата зад мене, каде што се наоѓа касарната во Ѓорче Петров“.
Од јавното претпријатие „Водовод“ денеска преку соопштение ја информираа јавноста дека подготвен е оперативен план со кој се предвидува прецизна постапка за овој зафат со цел брзо и ефикасно решавање на проблемот.
„Се очекува оваа операција да заврши за помалку од 15 часа во кои најмногу време се одвојува за празнење и полнење на магистралниот водовод“, велат од „Водовод и канализација“.
Граѓаните подготвени за она што ги чека, велат дека веќе се снабдиле со вода и имаат направено залихи, со оглед дека вода за пиење и хигиена нема да има додека целосно не се санира дефектот. Рафтовите за вода во маркетите постојано се празнат и се надополнуваат.
Вода се купува на големо, но и покрај зголемената потрошувачка од „Пазарниот инспекторат“ велат дека не е пријавено или забележано поскапување.
„Нема менување на цени. Сега кај некои помалите правни субјекти, помалите малски субјекти, тоа може да се оди по пријава, меѓутоа да, ќе излеземе на терен, ќе го увидиме“, рече Влатко Стојкоски, директор на пазарен инспекторат
Немањето вода ќе биде проблем и за функционирањето на клиниките. Одложени се операциите во Клиничкиот центар, а од Министерството за здравство објаснија дека ќе се третираат само итни случаи.
Љубиша Владимиров
