„Управување во услови на неизвесност и градење отпорни јавни институции“ е тема на „CEF форумот 2026“ кој ќе се одржи денеска во Скопје со почеток во 14 часот.
Форумот е организиран од Министерството за финансии во соработка со Центарот за извонредност во финансиите (CEF), водечка регионална институција и доверлив партнер за реформи, која им помага на земјите од Југоисточна и Источна Европа во зајакнувањето на јавните институции, забрзувањето на реформите и унапредувањето на процесот на европска интеграција.
Конференцијата ќе ја отворат министерката за финансии Гордана Димитриеска Кочоска која е домаќин на форумот и Јана Репаншек, директорка на Центарот за извонредност во финансиите (CEF).
-Форумот ќе ги обедини носителите на политики и клучните носители на одлуки, вклучително и министри, гувернери на централни банки, високи владини претставници и истакнати меѓународни експерти, кои ќе разменат мислења за предизвиците поврзани со управувањето во услови на неизвесност, институционалната отпорност и доброто владеење, наведуваат од Министерството за финансии.
Настанот претставува значајна регионална платформа за размена на искуства и стратешки дијалог, насочени кон зајакнување на јавните институции и унапредување на јавните политики.
Пред официјалното отворање на Форумот, ќе се одржи Годишниот состанок на Управниот одбор на Центарот за извонредност во финансиите (2026 Annual Meeting of the CEF Governing Board), на кој ќе учествува претседателот на Владата, Христијан Мицкоски.
