Царинските службеници на граничниот премин Табановце, на влез во државата, запленија хашиш, амфетамин, МДМА и тетрахидроканабинол, пронајдени кај германски државјанин кој патувал со својот сопружник. Случајот е документиран и со снимка од телесните камери, кои беа обезбедени како донација од Министерството за правда на САД – информираат од Царинската управа.
Во случајот, откога автомобилот бил селектиран за контрола, царинските службеници пронашле супстанција во зеленикава боја спакувана во црна кесичка, жолта восочна супстанција спакувана во црни кутивчиња, дрога во форма на бомбони, како и дробилки и вага за прецизно мерење. Извршен бил и личен претрес на осомничениот, при што се пронајдени дополнителни количини супстанции во зеленикава боја, бела прашеста материја, гел во бела боја и таблети во портокалова и кафеава боја.
Лицето било приведено од страна на инспектори од Одделението за истраги и преземени биле предистражни дејства, во чии рамки, со налог на јавен обвинител, извршено било и вештачење на дрогата, со што е утврден нејзиниот состав. Против сторителот е поднесена кривична пријава до ОЈО Куманово за неовластено производство и пуштање во промет наркотични дроги, психотропни супстанции и прекурсори.
