Бугарските тврдења дека не постои македонски јазик се испена песна, без никаква научна подлога. Тој е потврден уште пред осумдесет години и признат низ целиот свет. Директорката на Институтот за македонски јазик, Елена Јованова Грујоска, вели дека истиот се изучува насекаде низ светот, што јасно покажува дека е признат како таков. Жали што истиот во Софија се користи за дневнополитички теми.
-Тоа е испеана песна одамна и мислам дека сега користат некои дневнополитички моменти, за повторно да се актуелизира последниве две три години тоа прашање. Ова прашање е апсолвирано далечната 1944-та година. Значи пред 80 години е апсолвирано, целиот славистички свет и општо лингвистиката во светот го признаа македонсиот јазик, изјави Јованова Грујоска.
Универзитетскта професорка Лидија Тантуровска вели дека нема никаква потреба во 21-от век да се користи ваква реторика, бидејќи секаде јасно е потврдено дека македонскиот јазик постои.
-Такви изјави отсекогаш постоеле, сметам дека сега во 21-от век кога постојат современи јазици кои се кодифицирани, сметам дека апсолутно тоа не треба да биде на дневен ред. Науката се занимава со научни истражувања, тоа е покажано со научните документи, така што сметам дека сето друго не е наука, изјави Тантуровска.
Инаку, во рамките на отворените денови на Институтот за македонски јазик „Крсте Мисирков“ во Скопје беше отворена деветтата Меѓународна научна конференција насловена „Македонски јазик- извор на научни истражувања“.
