Повеќе пари за плати, пензии, помаку за социјални надоместоци. Ќе се градат патишта, болници, училишта – предлог буџетот за наредната година стигна во Собранието. Владата планира од државната каса да потроши 6,73 милијарди евра, а да собере 6,1 милијарди евра. Од даноци ќе се соберат речиси 3 и пол милијарди евра, што е пораст од 6%. Во државната каса ќе се слеат повеќе пари од данок на личен доход за 8,7%. Најголем пораст ќе има кај приходите од данокот на добивка од над 14%. Од ДДВ во државната каса ќе се инкасираат 1,5 милијарди евра. Акцизите ќе опфатат 582 милиони евра или 1,3% повеќе. Од социјални придонеси на граѓаните ќе се наплатат 1,98 милијарди евра. Ваквите амбициозни планови главно се засноваат на воведувањето на е-фактура, намалување на сивата економија и дигитализација на процесите.
„Целта на даночната политика е насочена кон намалување на даночната евазија, формализација на неформалната економија и дигитализација на даночните процеси, со што ќе се овозможи создавање на праведен и транспарентен даночен систем. Притоа, институциите ќе ги зајакнат своите капацитети и ќе воведат нови технологии за поефикасна и автоматизирана наплата на даноците. Дигитализацијата на даночните процедури е една од главните цели во процесот на даночна реформа, а со воведувањето на е-фактура би се спроведувала даночната контрола на подобар и поефикасен начин“ – стои во текстот на Предлог-буџет.
Тековните расходи за редовна исплата на плати на вработените во јавниот сектор, пензии, социјални права, исплата на субвенции, поддршка на економијата и иновативните активности изнесуваат 6 милијарди евра. Од нив, за пензии вкупно ќе се потрошат 1,9 милијарди евра, или за речиси 10% повеќе. За плати во администрацијата 855 милиони евра или дополнителни 7%. Намалена е ставката стоки и услуги за 0,5% на 454 милиони евра, како и сумата за социјална заштита за 15,7% на 195 милиони евра. За активни мерки за вработување ќе има на располагање 42 милиони евра. Трансферите до општините се на нивото од 585 милиони евра. Помал буџет има Владата за 8 милиони евра, како и претседателката на државата, а поголем Министерството за социјална политика, за економија и труд и за енергетика. Ќе има повеќе пари за амбулатни возила и набавка на автобуси.
Капиталните инвестиции се намалени на реално ниво кое може да се исполни од 654 милиони евра. Предвиденио е да се градат неколкуте делници од Тетово до Кичево како и да заврши изградбата на Кичево-Охрид. Ќе има пари и за изградба на втиората делница од пругата Бељаковце – Крива Паланка. Предвидена е изградба на заеднички железнички граничен премин со Србија, односно изградба и опремување на железничка станица Табановце. Ќе има пари за регионална станица за цврст отпад како и изградба на пречистителни станици во Битола и Тетово.
Буџетскиот дефицит треба да биде намален на 3,5% од БДП и да изнесува 637 милиони евра. Вкупно државата ќе се задолжи за 1,9 милијарди евра, од кои надворешното задолжување ќе биде 1,38 милијарди евра, а домашното 579 милиони . Догодина треба да се вратат долгови од 1,26 милијарди евра. Во странство треба да вратиме речиси 900 милиони евра, а внатрешниот долг кој треба да се отплати е 324 милиони евра.
