Хеликоптери, противпожарни возила, возила за итна помош, полиција, и сите доктори на работа – бројот на жртвите ќе беше далеку поголем, доколку вечерта и во текот на кобната ноќ овие служби не реагираа активно, брзо и со сите капацитети што им беа на располагање. Вака противпожарната, полицијата, Центарот за управување со кризи, лекарите, болниците, реагираа во првиот клучен момент, за да спасат што повеќе млади животи и да ги извлечат од пожарот во кочанската дискотека. Со оглед на можностите, капацитетите и ресурсите на институциите, вработените брзо и самоиницијативно се мобилизираа и дадоа се од себе за да ги спасат загрозените.
Директорот на Институтот за меѓународни стратешки и безбедносни студии, Раби Седрак вели со оглед на ресурсите екипите за итна интервенција брзо реагирале и пружиле помош на повредените.
Сабота спрема недела 3 часот после полноќ. На 112 во Центарот за управување со кризи се јавила една мајка на девојче кое било на журката и пријавила дека гори дискотеката во Кочани. По неколку се секунди се изгубил контактот, а мајката во паника го информира Центарот за управување со кризи. Почнува координацијата.
За кратко, пред дискотеката пристигнала полициска интервенција и екипи на Брза помош од источниот дел на Македонија.
Во неделата наутро, речиси сите докторите и медицинските сестри од клиниките во Штип и Кочани се самомобилизирале. Во скопје Клиниките ги отворија вратите и беа спремни за повредените кои од Штип и Кочани се транспортираа до главниот град. Некаде околу 6 часот, со хеликоптер почна транспортот на повредените до ГОБ 8 септември.
Медицинарите самоиницијатнивно се кренаа на нозе и дојдоа да пружат помош. Лекарите и сестрите од скопските клиники се јавиле веднаш на работа откако јавноста дозна за најголемата трагедија што и се има случено на Македонија.
Во борбата со чадот и пламените јазици, животот го загуби и полицаецот кој во патролната контрола влегол во дискотеката 15 минути пред да се вивне пламенот.
Во извлекувањето на повредените и жртвите повредени се и тројца пожарникари. Засега, докторите и сестрите неуморно работат и даваат се од себе во лекувањето на повредените. Според информациите на надлежните, тие засега неколку дена неуморно го издржуваат темпото и соработуваат со колегите коишто дојдоа од Чешка Израел и Белгија. Спремни беа и тимовите на Црвен крст кои заедно со Брзата помош веднаш беа распоредни по клиниките и пружија поддршка на семејствата на повредените и загинатите.