“Нема поубава чувство од тоа да знаеш дека со твоето малку, на некој си му овозможил многу“- вака штипјанец Александар Трајковски го објаснува својот хуман гест, донирајќи пакети за семејства од социјално-ранливи групи. Овој 82годишен старец и годинава ја продолжи својата традиција. Шеснаесет години по ред од својата пензија купува намирници и подготвува пакети со посна и мрсна храна доволна за празничната трпеза за Бадник и Божиќ.
„Содржат се што е потребно за Бадник и Божиќ и посно и мрсно. За мене чувството е добро затоа што знам дека шест фамилии ќе седнат и ќе вечераат, ќе има што да јадат“ изјави Александар Трајковски.
Трајковски не бира вера. Пакетите кои ги донира ги прави и за христијани и за роми. На овој начин, вели тој се покажува човечноста, бидејќи сите сме исти, од крв и месо. Семејствата кои со помош на Црвениот крст годинава се најдоа на списокот, на Трајковски му се заблагодарија за несебичниот гест ..
“Оваа донација за нас многу нешто значи, нема да седнеме на празна трпеза“ му се заблагодари штипјанка која прими донација од Трајковски.
Да помага му е оставено како аманет од покојната сопруга. Се надева дека ќе го послужи здравјето и ќе ја продолжи со својата хумана мисија. Упати апел до граѓаните да покажат поголема емпатија со што ќе овозможат достоинствени празници за сите.
Александра Ристевска
