Општина Берово обезбеди 1.025.046 денари за изградба на пристапната улица „2“ со крак, во рамки на Имплементацијата на Декадата и Стратегијата на Ромите, преку Министерството за транспорт.
Улицата, со должина од околу 115 метри, ќе биде поплочена со бекатон плочки, со што, како што информира градоначалникот на Берово Петар Ружински, ќе се подобрат условите за движење и пристап до имотите на жителите.
Со реализацијата на проектот се очекува да се овозможи полесно и побезбедно движење, подобро одведување на површинските води и поголема заштита на имотите.
Ружински посочува дека проектот има особено значење за жителите, бидејќи улицата претставува важна врска со постојната јавна инфраструктура, а истовремено е усогласен со Локалниот акциски план за Ромите на Општина Берово за периодот 2023–2026 година.
-Со вакви проекти создаваме еднакви услови и подобар квалитет на живот за сите наши граѓани, наведува Ружински.
Од Општина Берово најавуваат дека продолжуваат со реализација на инфраструктурни проекти насочени кон подобрување на патната инфраструктура, поврзаноста и условите за живот во сите населби.
„Улица по улица, населба по населба – продолжуваме да создаваме во Берово подобра инфраструктура, подобра поврзаност и еднакви услови за сите“, порача градоначалникот Ружински.
