Со желби за здравје, среќа и мир во светот православните христијански верници го слават Бадник – денот пред Христовото рождество. Скопскиот соборен храм го наполнија стотици граѓани да си земат бадникарски гранчиња за бадниковата трпеза. Денот започна со молитва во сите православни цркви, а централната манифестација, по традиција, беше во соборниот храм Свети Климент Охридски.
„Денес е Бадник, ден пред Божиќ, ден кога ние го дочекуваме еден од најголемите господови празници, раѓањето на господ Исус Христос, и ова е радосен ден за нас православните христијани, затоа што ние го очекуваме еден од најрадосните моменти што се случил во историјата на човештвото. Тоа е ден во кој што ние се радуваме за Христовото раѓање, многу значеан ден за нас православните христијани и треба да се потрудиме да ја задржиме таа духовна молитвена атмосфера во текот на целиот ден“ вели отец Антонио
Не изостана ниту традиционалното доаѓање на пајтонот со кумовите и здравичарот со музика и топла ракија. Бадниковиот ќуп со гранчиња од стариот беше предаден на новиот кум кој со него замина дома.
„Да си ја сакате и почитувате верата, да го негувате јазикот, обичаите, традицијата и историјата македонска“ вели Радомир Макеларски, кум бадникар 2025
„Запалените огнови на Бадниковата вечер ги осветлуваат и нашите срца, предрадосното очекување на раѓањето Христово“ вели Атанас Петров, здравичар
Празникот граѓаните ќе го поминат во кругот на семејството во домашна атмосфера, ќе имаат посна трпеза и традиционално – лепче со паричка кое ќе се крши пред почетокот на ручекот и се верува дека на тој што ќе му се падне паричката ќе биде среќен во текот на целата година. Бадник е ноќта на мирот, радоста и сплотеноста, за Божиќ традиционално се подготвува мрсна трпеза која го означува крајот на божиќните пости.
Давид Крстевски
