На градоначалничката Арсовска никако да ѝ се погодат директорите на јавните претпријатија кои самата ги именува. Последната во низа промени е во комуналното претпријатие „Дрисла“. Таму е сменет Ненад Јосевски и на негово место е назначен Самир Хусеини кој доаѓа од „Водовод и Канализација“.
Иако Јосевски е на функција само шест месеци од Град Скопје велат дека е сменет поради тоа што му истекол договорот кој не му го продолжиле.
„На в.д директорот на ЈП Дрисла му истече согласно договор рокот за кој беше ангажиран“, велат од Град Скопје.
Од 2022 година, ова е веќе трета промена на раководната позиција во „Дрисла“. Пред Јосевски, со претпријатието директоруваше Александар Кузинаков . Тој беше разрешен лани, кого Арсовска го обвини за злоупотреби.
Инаку Арсовска стана рекордер во смената на директорите на скопските јавни претпријатија. Нејзиниот мандат го одбележаа повеќе скандали отколку реализирани проекти. Како на производна лента смени повеќе од 30 директори во 11 институции и јавни претпријатија под надлежност на градот.
Праксата на смени на челните позиции почна од Јавното претпријатие „Градски паркинг“ каде за четири години се сменија четворица директори . Промени во раководните позиции имаше во скопското Комунално претпријатие, каде се сменија дури пет директори. Тројца се сменија и во Градски паркинг, исто толку и во скопската зоолошка за помалку од три години. Смени имаше и во ЈСП, каде за четири години се сменија четворица директори. Разрешување на еден и назначување на друг директор имаше и во Младинскиот културен центар.
Љубиша Владимиров
