На недела дена пред Нова година, скопјани се уште не знаат дали на Плоштадот Македонија ќе има прослава за најлудата ноќ. Градоначалничката Арсовска и оваа година одлучи да не биде транспарентна кон медиумите и не открива дали ќе има и каков ќе биде дочекот на градскиот плоштад.
Граѓаните најубавиот ден од годината посакуваат да го дочекаат во празнична атмосфера во центарот на градот, традиционално како што имало и до сега… како што се ужива и во другите европски и светски метрополи.
И додека Арсовска молчи, скопските градоначалници самите се организираат за прослава во своите општини. Во Кисела Вода, граѓаните ќе можат да ја дочекаат Новата година на платото, кај салата Расадник. Во претпладневните часови ќе има детски забавен дел, а вечерта ќе уживаат во музичкиот ритам на македонските пејачи како Врчак, „ДНК“ и „Куку Леле“, Игор Џамбазов и други.
Забавни програми во меѓувреме има и во другите скопски општини. Градоначалникот на Шуто Оризари ги повика скопјани да дојдат на плоштадот во општината, најавувајќи богата музичка програма. „Удри“ и по Арсовска.
„Покрај недостатокот на елементарна способност за обезбедување на основни јавни услуги, Данела има недостаток на идеја, волја и желба да се усреќат сограѓаните барем за нивогодишните празници, оставајќи ја најубавата јавна површина во градот штура, нема и без програма. Затоа, ги поканувам сите граѓани на градот Скопје на 31ви декември да ни бидат гости на плоштадот во општина Шуто Оризари, каде што ќе можат ја доживеат новогодишната атмосфера во полн ек“, вели Курто Дудуш, градоначалникот на Шуто Оризари.
Во Аеродром веќе има Зимзоленд, кај спортскиот центар „Јане Сандански“, каде има забава за сите генерации од најмали до највозрасни. Програмата ќе трае до 19 јануари 2025 година, а скопјани уживаа и во концертот „Аеродром пулсира“ викентот што измина… Граѓаните уживаа и во новогодишна зимска бајка, викендот во Ѓорче Петров, каде имаше забавна програма и културни содржини за сечиј вкус.
Љубиша Владимиров