Македонските граѓани сакаат да бидат партиски активни повеќе во споредба со луѓето од регионот. Секој седми граѓанин е член на некоја политичка партија, а речиси третина од избирачите се инволвирани во политички активности во предизборни кампањи, покажува анкетата на Инстутот за социолошки и политичко-правни истражувања.
Јован Близнаковски, кој го направил истражувањето вели дека резултатите покажале оти во Македонија се гласа по етничка линија и дека политичките партии дома бројат најголем број членови, споредено со регионот.
„Главните наоди покажуваат јасно дека во Македонија многу се гласа по етничка линија, тоа е нешто што го знаеме, но со овие наоди можеме да дојдеме до некаков пресек. Има исклучоци од етничко гласање, но се многу ретки и се однесуваат на само на одредени политички опции“, рече Јован Близнаковски.
Анкетата покажала и дека е многу јасно големото незадоволство кај граѓаните од СДСМ и ДУИ, кое и постизборно е исто како и пред изборите. Тоа и доведе до пад на претходната влада. Незадоволството е многу повеќе регистрирано кај македонските граѓани отколку кај гласачкото тело од албанската заедница во Македонија.
„Имаме податоци кои јасно укажуваат на тоа дека гласачкото тело во голема мера е незадоволно од работата на таа претходна влада од 2020 до 2024 година. Тоа незадоволство е различно по етничка линија. На пример гледаме кај етничките Македонци, тоа незадоволство е значително поголемо што не е случај со етнчките Албанци. Така да на некој начин тоа може да се гледа како некоја казна за таа влада“, рече Јован Близнаковски, од Институтот за социолошко и политичко правни истражување.
Истражувањето покажало и дека жените и помладата генерација во Македонија не се доволно вклучени во политичките процеси и дека тоа се работи кои треба во иднина да се надминат.
Инаку анкетното истражување е спроведено на 1056 испитанци избрани по случаен избор, во периодот од 25 октомври до 4 декември минатата година. Се спроведува во изминатите 25 години во регионот и пошироко, но за првпат е направено во Македонија.
Љубиша Владимиров
