Начини има, потребна е само желба за Бугарија да ги испочитува одлуките за слободно здружување на македонското малцинство. Челниците во Брисел можат да направат реален притисок врз властите во Бугарија – токму нивната земја членка да ги спроведе бројните пресуди на Европскиот суд за човекови права и Советот на Европа.
- „Ова не е прва победа, претходно имавме 16-тина од овој тип кои биле донесени. Најголем проблем е спроведувањето од Бугарија – земја членка на ЕУ. Е сега останува да видиме дали ЕУ ќе ја притисне да ги спроведе“ рече Ристевски.
Политичкиот аналитичар Ристевски коментира дека последната одлука од Стразбур е само уште една потврда дека долгогодишната стратегија на официјална Софија не е само непризнавање на македонското малцинство, туку негирање на целата македонска нација.
- „Ова е своевидна долгогошната стратегија на нашиот источен сосед да го негира не само македонското малцинство, туку и на целата македонска нација. Прашање е на време дали прво ќе се избере понормална и демократска власт на изборите кои претстојат кај историчниот сосед следниот месец“ вели Ристевски.
За последната одлука на Советот на Европа реакција стигна и од македонското здружение ОМО „Илинден“ Пирин. Велат дека и се стеснува просторот на Бугарија за маневр и спроведувањето на одлуките од европските институции.
- „Комитетот на министри на Советот на Европа „силно ги повикува властите да преземат решителната акција за која Комитетот ги повика во своите претходни одлуки за да се осигура дека секое ново барање за регистрација на здруженијата апликанти или слични здруженија се испитува во целосна согласност со обврската од член 11 од Конвенцијата за заштита правото на слобода на здружување“
- Времето и просторот за маневрирање на Бугарија завршува. Ако нема регистрации на македонски организации во најскоро време Комитетот на министри треба да започне со казнени процедури. За жал бугарските власти не му оставаат други опции на цивилизираниот свет“ стои во реакцијата на ОМО „Илинден“ Пирин.
Комитетот на министри на Советот на Европа во својот најнов извештај истакнува дека бугарските власти и по 18 години со неосновани образложенија се мешаат во правото на слободно здружување на Македонците во Бугарија. Истовремено и даде рок на Бугарија до 16 декември да се рапортира по сите прашања кои се констатирани, бара конкретни резултати од Работната група која била формирана а непризнавањето на македонското малцинство од источниот сосед ќе биде тема на дебата и на состанокот во март идната година.
