Седечкиот начин на живот и брзата, преработена храна сè повеќе го нарушуваат здравјето на граѓаните. Податоците на Институтот за јавно здравје се загрижувачки – дебелината е во пораст и кај возрасните, и кај децата.
„Дебелината и прекумерната телесна тежина во Македонија, според Светскиот атлас за дебелина на Светската здравствена организација, изнесуваат околу 60 проценти, односно толкав е уделот на лица со прекумерна тежина и дебелина. Околу 30 проценти од возрасните имаат дебелина. Тоа значи дека состојбата е алармантна, односно нашата земја е сериозно погодена од овој проблем. Во однос на регионот, веднаш по Хрватска, сме меѓу земјите со највисока преваленца на дебелината“, изјави Ирфан Ахмети.
Експертите предупредуваат дека состојбата е сериозна. Поголемите, но нутритивно неквалитетни оброци, во комбинација со нездрави животни навики, се меѓу главните причини за оваа појава. Тие посочуваат дека клучот за справување со проблемот е системски пристап.
„Тоа подразбира нездрава исхрана, односно исхрана богата со калории, рафинирани шеќери, сол и масти. Понатаму, физичка неактивност, нарушен ритам на спиење, неквалитетен сон, како и влијанието на стресот“, изјави Ирфан Ахмети.
„Потребно е подигање на свеста кај општата популација за промена на животниот стил, односно интервенција во раната фаза за превенција на појавата на прекумерна телесна тежина.“
Дебелината не е само естетски проблем, туку сериозна закана за здравјето.
„Докажано е дека, поради нарушениот метаболизам, дебелината е директно поврзана со појавата на бројни хронични заболувања, меѓу кои кардиоваскуларните и срцевите болести, дијабетесот тип 2, апнејата при спиење, замастениот црн дроб, остеоартикуларните промени, па дури и зголемениот ризик од појава на канцер“, изјави Ирфан Ахмети.
Најважниот чекор во справувањето со овој проблем е превенцијата. Промовирањето здрав начин на живот, особено кај децата, воведувањето здрави прехранбени навики и избегнувањето неквалитетни производи се вистинскиот пат кон поздраво население.
Ана Минин
