Со чистење на отпад од јавни површини и засадување на украсни дрвја низ градскиот парк, во Гостивар започна акција за уредување и пролетно чистење на неколку локации. Во акцијата која е во организација на локланата самоуправа се вклучија повеќе институции и компании со што, како што беше речено пред почетокот на активностите, освен што се уредуваат јавните површини се дава и поттик за подигање на свеста и грижата за животната средина.
– Освен што ќе се исчисти градот, сакаме да испратиме и порака до граѓаните за да ја подигнеме свеста за нашиот град да биде почист и тие да бидат дел од оваа голема акција. Активностите ќе продолжат и предвидено е да траат и во наредните месеци и во текот на летниот период. Се надевам дека резултатот од ова ќе се види во наредните месеци, рече градоначалникот на општина Гостивар, Ваљбон Лимани.
Тој посочи дека деновиве се работи според план кој го направиле во комуналните претпријатија, а помош имаат и од општествено одговорни компании кои сакаат да помогнат во таканаречената „генералка“ низ градот и активно ќе учествуваат.
Во градскиот парк се појавија волонтери и вработени кои дел со тешка механизација расчистуваа поголеми количини на несоодветно депонира отпад, а се уредуваа и зелените површини.
Арта Асани, директорката на ЈП „Комуналец“ ја искористи оваа прилика да упати апел до сограѓаните да водат повеќе сметка каде го фрлаат ѓубрето и кабастиот отпад.
– За жал има и такви граѓани кои не се свесни и фрлаат насекаде отпад па дури и габаритен отпад. Затоа апелирам да ни се јават на телефонскиот број кој е специјално за таа намена. Услугата е бесплатна, рече директорката Асани.
Освен косење на тревата во големиот парк, комуналните работници засадија и десетина украсни дрвца и хортикултурно уредија еден дел. Неколку цистерни со работници од „Бехтел и Енка“ и пожарникарите ги миеја улиците низ централното подрачје. Дел од вработените со раководството на локалната самоуправа, волонтери од Црвениот крст собира смет од тротоарите и јавните површини од градскиот стадион до судската зграда.
