Агенцијата за храна и ветеринаство ги засилува акциите,се спроведуваат вонредни инспекциски надзори во угостителски објекти, сендвичарници, кебапчилници,слаткарници низ цела Македонија. Податоците поразителни,само во првите 6 месеци од годинава уништени биле вкупно 37,6 тони и 13.654 литри небезбедна храна-четвртина од таа храна, односно околу 9 тони биле уништени во текот на летната сезона во Охрид, Струга, Преспа и Дојран.
- “Стануваше збор за недекларирана храна,немање на санитарно инспекциски документи,немаше никаков увоз ,не беа операторите регистрирани како оператори за храна”-вели Оливер Миланов,директор на Агенција за храна и ветеринарство.
Покрај изречените прекршочни и кривични пријави,сред лето четири објекти во Струга биле затворени.И не само таму,поради труење со храна Агенцијата ставила клуч на врата на сендвичара и ресторант во Скопје.
Од Агенцијата за храна и ветеринарство и деновиве извршиле вонреден инспекциски надзор во Охрид,Струга и Кичево.
- Агенција за храна и ветеринаство: “Поради пласирање небезбедна храна на ресторан во Кичево изречена му е времена забрана за вршење на дејност.Уништени се 187 килограми небезбедна храна од животинско и неживотинско потекло, а изречена е и парична казна од 1400 евра. Во Струга, маркет е казнет со 1400 евра поради пласирање на небезбедни производи со поминат рок,без декларации и несоодветно означување на производите. Во истиот град, казнета е месарница со 500 евра поради пласирање на небезбедни производи на пазарот.Уништени се 50 килограми храна од животинско потекло.”
Надлежните уверуваат дека македонските граѓани јадат здрава храна и покрај тоа што често се повлекуваат одредени производи од пазарот. Поради присуство на надворешно тело,деновиве се повлекоа српски бисквити,претходно од продажба беа повлекувани разни млечни производи и други намирници како чипсови.
- “ Се она што ќе се најде кое не е по пропис и по правилник, соодветно се третира, за да не дојде до трпезата и до менито на граѓаните да претставува здравствен проблем“-вели проф.Игор Џаџовски,Ветеринарен факултет.
Згора на се’ при контролите кај некои од објектите утврдени биле незадоволителни хигиенски услови, вршење на активност која не е одобрена од Агенцијата за храна и ветеринарство, непоседување на санитарни книшки за вработените и други недоследности.
Росица Голабоска
