Агенцијата за храна и ветеринарство (АХВ) денеска соопшти дека е континуирано на терен, дека ја следи состојбата со сипаниците кај овците и дека навреме ги презема потребните заштитни и контролни мерки. Во однос на можната вакцинација, информира дека е доставена информација за донација на вакцини до Европската комисија и до Република Турција.
– Експертската група континуирано се состанува и донесува соодветни мерки. Дополнително, повторно е побарана помош од EUVET-тимот на Европската комисија за справување со болеста. По добивањето одговор за вакцинација, ќе се пристапи кон тестирање на безбедноста и чистотата на вакцината, по што ќе се почне со вакцинација. Секоја вакцинација на сопствен трошок на сточарот, без одобрена вакцинација од страна на Агенцијата, соодветно ќе биде санкционирана и нема да се врши компензација на заболените животни, односно обесштетување за одземените животни – наведува АХВ во одговорот до медиумите по прес-конференцијата на Сојузот на одледувачите на овци, кој утрово пред Владата алармира за ситуацијата со сипаниците.
Агенцијата за храна и ветеринарство вели и дека преку ветеринарните друштва, со кои има склучено договор за вршење активности од јавен карактер, добива информации за појава на болести во одредени одгледувачници.
– По добивањето на информација, се земаат примероци за испитување присуство на вирусот на сипаници кај овци и кози (крв и брисеви). По потврдување на болеста, директорот на АХВ донесува решение за спроведување контролни и заштитни мерки за справување со болеста, при што се пристапува кон евтаназија на животните и нивно закопување – се нагласува во соопштението.
Директорот Оливер Миланов, на прес-конференција во Министерството за здравство, одговорајќи на новинарско прашање рече дека кај дел од вакциините кои сточарите ги применувале на своја рака, а биле несоодветни, добиени се позитивни мостри.
-Согласно годишната наредба, ние веќе пративме допис за вакцини од Турција претходната недела во соработка со турската амбасада. Очекуваме 500.000 вакцини да бидат стигнати, рече Миланов.
Одгледувачите денеска уште еднаш побараа итна вакцинација на овците против сипаници и повисоко обесштетување.
