Агенцијата за филм го оштетила државнот буџет и го загрозила производството на домашни филмови за идните пет години. Истражувањето на ТВ Алфа, покажува дека токму институцијата која треба да се грижи и да ја развива македонската филмска индустрија, ја довело пред колапс. Во надзорните извештаи на Министерството за култура, до кои ТВ Алфа конечно дојде и тоа повикувајќи се на законот за пристап до информации од јавен карактер, утврдено е дека во Агенцијата за филм, додека со неа директорувал Бојан Лазаревски, еклатантно ги прекршувале законите и дека се под сомниение за кривична одговорност.
- Во 2022 година, Агенцијата за филм по конкурсите за финансирање на филмски проекти од национален интерес, распределила средства во износ од 330.906,250,00 денари (двојно повеќе од средствата предвидени за филмска дејност во буџетот), со што не само што го оштетиле буџетот, туку го загрозила остварувањето на филмската дејност во следните пет години. – Пишува во надзорниот извештај на Министерство за култура за работата на Агенција за Филм.
Одговорните во Агенцијата за филм, наместо да ги санкционираат продукцентските куќи на кои им доделиле народни пари за да создаваат уметност, тие често ниту барале отчет за тоа, на што се трошат парите, ниту пак поднесувале тужби за средствата да се вратат назад во државниот буџет. Напротив, чекале договорите да застарат, па продуцентите да се ослободат од одговорност и воопшто да не треба да ги вратат парите, иако не снимиле филмови.
- Агенцијата за филм овозможила побарувањата за враќање на средствата да застарат и да не може да бидат наплатени по судски пат, што претставува основ за кривично гонење бидејќи лицата кои биле надлежни да го сторат тоа, не го сториле, поради што постои основано сомнение дека сториле кривично дело злоупотреба на службената положба и/или несовесно работење во службата. – Стои во извештајот на култура.
Алфа ТВ откри и дека 39 проекти добиле околу 50 милиони денари од државниот буџет, односно 813 илјади евра преку Агенцијата за филм, а ниту снимиле филмови, ниту пак ги вратиле парите назад кај државата. Во меѓувреме, иако владата и Министерството за култура знаеле за злоупотребите во филмскиот фонд, останува дилема, дали и тие биле соработници, па затоа не направиле ништо за тоа да го спречат или да го санкционираат.
Никола Цветкоски
