Агенцијата за остварување на правата на заедниците вчера го одбележа 10 Декември – Меѓународниот ден на човековите права со свечена мултикултурна манифестација во Кинотеката на Македонија. Настанот беше посветен на промовирање на еднаквоста, достоинството, почитувањето и богатството на различностите што ја градат заедничката иднина на сите
заедници во државата.
Присутните ги поздрави директорот на Агенцијата, г-дин Далибор Китановиќ, кој истакна дека човековите права претставуваат секојдневна обврска и заедничка одговорност, а дијалогот и солидарноста се темел на изградба на правично и демократско општество.
Во рамки на културно-уметничката програма настапија истакнати артисти и културно-уметнички друштва, меѓу кои Драган Спасов – Дац и Александар Митевски, КУД „Љиљан“, КУД „Српски Вез“ – Куманово, КУД „Јени Јол“, Љупчо Тасков – Џујапи, КУД „Бајрам Шабани“ и Ансамблот за ромски игри и песни „Рушид Шаќир“. Со своите изведби тие ја претставија културната
разновидност на заедниците и значењето на заедништвото преку воспоставување мостови на меѓусебно почитување.
На сите учесници им беа доделени Благодарници како признание за придонесот во одбележувањето на Меѓународниот ден на човековите права и во унапредувањето на мултикултурниот дух во Македонија.
Настанот заврши со заеднички коктел и дружење, при што беше упатена порака за продолжување на вложувањата во човековите права, културниот дијалог и промовирањето на еднакви можности за сите граѓани.
Агенција за остварување на правата на заедниците
