Култната претставата „Чичко Кумплунг “ се враќа на тетарската сцена. Сега во режија на Јани Бојаџи, а премиерата ќе биде изведена утре во Театар Куманово. Работена според пиесата „Прирачник за самоуништување“ од Сашко Насев, станува збор за црна комедија и сатира која го прикажува општеството во транзицискиот период во Македонија во 90-тите години.
„Ова е праизведба на македонска драма на сцените на кумановски театар, што е дополнително задоволство за мене, за ансамблот и за институцијата. Ние мора да разбереме дека без македонска драматургија ние не можеме да направиме национален театар, без национален театар нема национална кинематографија, а без национална кинематографија нема национална телевизија и медиуми и немаме нација “, изјави Јани Бојаџи.
Преку хумор и сарказам, претставата зборува за политиката, секојдневниот живот и општествените апсурди од тоа време, прикажувајќи ги човечките слабости, разочарувања и обидот за преживување во еден нестабилен систем.
„Не беше тешко справувањето со ликовите, затоа што тоа беа наши мајки, братучеди, инспектори, комшии. Наши луѓе кои што едноставно во овој процес на транзиција, не успеале или многу тешко успеале да се снајдат и да го најдат своето место под сонцето“, изјави актерката Кети Дончевска Илиќ.
Проектот е поддржан од Министерството за култура, а претставата носи нова сценска обработка на еден од најпрепознатливите ликови од македонската филмска приказна.
Бојана Шурлиновска
