Денес отвораме нова фаза за македонската енергетика. Во време кога секој мегават-час е важен, Пазарот во тековниот ден е сигурносен вентил на нашиот систем, кој ни ја носи потребната флексибилност. Тој им овозможува на нашите компании да реагираат во реално време – да ги коригираат своите енергетски потреби на само неколку часа пред испораката, да ги намалат трошоците за дебаланси и поефикасно да управуваат со своето производство и потрошувачка, што значи помали трошоци за нив, а поголема стабилност за мрежата. Ова е особено важно и за нашата енергетска транзиција. Со него вратите за обновливите извори на енергија се ширум отворени. Македонија има сонце, но сончевата енергија и ветерот се непредвидливи. Со Intraday-механизмот таа непредвидливост повеќе не е пазарен ризик, туку развојна шанса – рече денеска министерката за енергетика, рударство и минерални суровини, Сања Божиновска.
Во обраќањето пред официјалниот почеток на Пазарот во тековниот ден, Божиновска истакна дека ова не е крајната дестинација, туку само почетна станица за македонското целосно интегрирање во европското енергетско семејство. Во следниот период, најави, продолжува натамошното развивање на пазарните механизми, продлабочувањето на регионалната соработка и приклучувањето кон процесите на спојување на пазарите во Европа.
– Пазарот во тековниот ден е нова фаза во развојот на нашиот електроенергетскиот систем и клучен чекор кон целосна либерализација и модернизација на пазарот на електрична енергија. Мора да признаеме дека овој процес, во одредени периоди, беше сериозно закочен од институционална инертност и недостиг на стратешки фокус. Со јасна политичка волја и со максимална посветеност го откочивме процесот, ја засиливме координацијата помеѓу институциите и заедно со МЕМО и сите вклучени партнери успеавме да го воспоставиме овој механизам, кој е од витално значење за државата – нагласи министерката.
Според неа, од утре фокусот се префрла на целосно пазарно поврзување (Market Coupling) со нашите соседи.
– Тоа ќе донесе поголема ликвидност и ценовна стабилност. Со ова истовремено ќе ги заштитиме нашите компании од дополнителните трошоци од ЕУ-механизмот за гранично приспособување на јаглеродот (CBAM), што значи заштеда на милиони евра за извозно ориентираните фирми. Паралелно, ќе работиме на зајакнување на институциите и на создавање услови за уште поголемо учество на приватниот сектор – истакна Божиновска дополнувајќи дека Министерството за енергетика останува посветено на развој на конкурентен и транспарентен пазар, на инвестиции во енергетската инфраструктура, на поддршка на зелената транзиција и обезбедување регулаторна стабилност и предвидливост за инвеститорите.
Пред присутните се обратија ипремиерот Христијан Мицкоски, генералниот директор на МЕМО, Зоран Ѓорѓиевски, генералниот директор на БСП и претседател на Управниот одбор на АДЕКС, Анже Предовник, како и Мартин Мартиновски, експерт за електрична енергија и статистика во Енергетската заедница.
