Македонија неминовно ќе има повисока инфлација во април. Тоа е неизбежно, поради глобалните случувања. Премиерот вели дека и земјите во регионот имаат раст на трошоците за живот помеѓу 4,5 и 6%. Дополнително лани во април функционираше и т.н. велигденска кошничка, што ги држеше цените на солидно ниво. Мицкоски е задоволен што месечната инфлација на најосновните прехранбени производи за еден месец не надминала 1 процент, што според него, е доказ за успешната работа на Државниот пазарен инспекторат кој врши ригорозни контроли.
„Ги следам трендовите во Европа, гледам има голем раст на инфлацијата во април во еврозоната, очекувам тоа да се случи и кај нас од проста причина што во април минатата година се уште имавме велигденска кошничка. Следам кај нашиот источен сосед инфлацијата е над шест проценти, Хрватска е некаде меѓу 5,5 и шест проценти, кај јужниот сосед е околу 4,5 до пет проценти, така што очекувам во тие рамки да биде и кај нас, но важно е да се види како ќе се движи месечната инфлација за основните прехранбени производи споредено со март. Она што го правиме со ДПИ, не очекувам таа да биде поголема од еден процент, месечната во однос на март. Добро е работите побрзо да се стабилизираат, да заврши конфликтот во Иран, да се отвори Теснецот, за да можеме и во рамките на глобалните случувања да имаме поголема предвидливост“ – вели Христијан Мицкоски – претседател на Влада.
Мерките и поволните кредити за помош на бизнисот даваат резултати. Мицкоски вели дека за една година биле креирани над 15 илјади нови работни места. Тоа според него е поради зголемените инвестиции на компаниите, кои пак ја развиваат економијата. Растот на номиналниот БДП кој годинава изнесува вкупно 22 милијарди долари бил за три пати повисок од оној во времето на претходната влада, вели премиерот. Тоа пак придонело за пад на невработеноста.
„Во моментов околу 710.000 има вработени и под 90.000 невработени кои се пријавени. Ако во овие под 90.000 невработени има околу 30.000 земјоделци, невработените се водат како работоспособно население од 15 до 65 години, ќе дојдеме до бројка од повеќе од 35-40.000 невработени што претставува под 5 проценти од работоспособното население. Ова е историски најниско ниво“ – вели Христијан Мицкоски – претседател на Влада.
Премиерот признава дека мерките кои Владата ги спроведува во последниве два месеци за задржување на животниот стандард на населението вршат притисок врз буџетот. Сепак, намалените акцизи и ДДВ придонесоа за Македонија да има најевтини горива на Балканот. Мицкоски вели дека состојбата се следи внимателно и покрај разочарувачките информации за уништување на танкери и рафинерии на Блискиот Исток, кои повторно ја дигнаа цената на нафтата нагоре на светските берзи.
