Министерството за локална самоуправа, како национален орган задолжен за Interreg програмите за прекугранична соработка, го започна процесот на консултации со локалните заедници за креирање на новите програмски документи за периодот 2028–2034 година, информираа денеска од општината.
Консултативната средба во Куманово се одржа во Занаетчискиот дом, а фокусот беше ставен на идниот развој на Interreg IPA програмата за прекугранична соработка со Бугарија. Во рамки на состанокот се дискутираше за потребите и потенцијалите за соработка во прекуграничниот регион, при што учесниците активно разменуваа мислења за утврдување на приоритетите и можностите за идни заеднички иницијативи.
Целта на овие средби е локалните заедници да се запознаат со почетните нацрт-документи и предвидените приоритети, но и активно да се вклучат во процесот на програмирање преку доставување сопствени предлози и идеи.
На консултациите присуствуваа секретарот на Општина Куманово, Емилија Сларидис Јаневска, како и претставници на општинската администрација, други општини, плански региони и невладини организации од источниот дел на државата.
