Намален број на трудови за втор и трет циклус за студентите. Зајакнување на автономијата на приватните универзитети. Ова се само дел од забелешките на стручната фела кои Владата ги разгледа и прифати во дополнувањето на измените за Законите за високо образование и научна истражувачка дејност. И двата закони од вчера беа објавени на ЕНЕР и се достапни за јавноста.
„Намаливме еден член од Владата, иако не беше неопходно, иако не се согласуваме со тоа дека тоа ја нарушува автономијата во Советот на универзитетите. Дополнително, направивме многу други промени во однос на критериумите, на пример, прифативме за општествено-хуманистичките науки така како што бараа наставниците, да биде релевантна базата Scopus, не ја исклучивме Web of science, но тие инсистираа да биде Scopus. Ќе биде Scopus. Дополнително, Националниот совет за високо образование ќе изработи друга база на списанија, што исто така ќе се бодира при изборите“, изјави министерката за образование Весна Јаневска.
Денеска е објавен и конкурсот за запишување во средно училиште. Годинава се очекува да се запишат околу 25.000 средношколци, а од нив 17.000 се предвидени да продолжат во средното стручно образование.
„Дуалното образование секако ќе биде фокус. Досега имаме потпишано договори со над 800 компании и продолжуваме да го стимулираме средното стручно образование за да ги пополниме празнините на пазарот на труд, односно она што им е потребно на компаниите за да се подобри производството. Конкурсот е денеска објавен, ќе видиме какви ќе бидат резултатите на крајот“, изјави министерката за образование Весна Јаневска.
Министерката Јаневска со градоначланичката на Кисела Вода Бети Стаменковска Трајковска денеска беа на увид на градежните во граедежните работи на новата спортска сала во основното училиште „Кузман Јосифовски Питу“ во Кисела Вода. Новиот објект ќе биде пуштен во функција од септември за почетокот на новата учебна година.
