ВМРО-ДПМНЕ и лидерот Христијан Мицкоски и натаму уживаат најголема доверба кај граѓаните, покажува најновото истражување на порталот МКД.мк и „Маркет вижн. И по речиси две години на власт, рејтингот на владејачката партија и премиерот останува висок и значително пред опозицијата. Довербата во Мицкоски, според анкетата, е поголема од вкупниот рејтинг на сите лидери на останатите политички партии.
На прашањето во кој лидер на политичка партија имате најголема доверба, една четвртина или 25,2% од испитаниците одговориле дека најголема доверба имаат во Христијан Мицкоски. Неговиот рејтинг е убедливо највисок пред сите останати лидери на политички партии. Петпати повисок од оној на Ахмети, односно дури седум пати повисок од оној на Венко Филипче кој ужива само 3,6% поддршка.
Високиот рејтинг на Мицкоски е безмалку идентичен со оној на ВМРО-ДПМНЕ за која дури 24% од граѓаните би гласале на следните избори. Втора партија е Вреди со 5,1 отсто доверба, па следуваат СДСМ со 4,9%, ДУИ 4,8%, Левица 3,1%, ЗНАМ 2. Најголем процент, 28,1 од испитаниците одговорија дека нема да гласаат, а 9,7% не знаат дали ќе гласаат.
Од оние кои се изјасниле за која политичка партија би гласале, повеќе од половина одоговориле за ВМРО-ДПМНЕ, додека 11,5% се определиле за Вреди, 11,1% за СДСМ, 10,9% за ДУИ, 7% за ЛЕВИЦА и 4,8% за ЗНАМ.
На прашањето дали сте за влез на Македонија во ЕУ со статус на земја набљудувач, без право на вето, Повеќе од половина (52%) од испитаниците изјавиле дека се за влез на Македонија во ЕУ .
Во однос на тоа во која насока се движат работите во Македонија, 36,2 отсто од испитаниците одговориле дека наоката е правилна, а 46,9 отсто од нив сметаат дека се движиме во погрешна насока.
Анкетата е спроведена од 2 – 18 март преку телефонско анкетирање на примерок од 1.200 испитаници.
