Баснословни суми од штанцани дежурства, долги листи на чекање за кои пациенти плаќаат и мито. Во македонското здравство има сериозни случауи на хаос и злоупотреби од кои некои лекари заработуваат огромни суми на сметка на државата и граѓаните. Министерот за здравство Азир Алиу денеска потврди дека имало случај со доктор кој за еден месец заработил 700 илјади денари. Детали не соопшти, но нагласи дека институциите ќе го решат овој проблем. Тој е решен целосно да стави крај на хаосот и да ги разбие долгите листи на чекање, за кои според министерот граѓаните плаќаат мито. Планот му е преку нов систем за регистрирање на работното време и казни за непочитувачите .
„Имаме ситуација каде што имаме доктори што прегледуваат само еден пациент неделно, а имаме доктори што прегледуваат 100 пациенти неделно. И едниот и другиот се отстапки и не се во ред. Тоа институционално ќе го решиме, Знаеме во секоја институција колку имаме вработени, колку тие вработени работат дополнително, колку часови работат, и дали се во согласност тие институции со законските предвидени ограничувања. Имаме институции коишто веќе се дефинирани дека тоа не е постапено, изјави Алиу.
Дека во здравството има случаи на злоупотреби предупреди премиерот од собраниска говорница. Тој обелодени дека има доктори кои си книжеле дежурства и така достигнувале и до 10 000 евра месечно. Си пишувале денови, саатници и викенди.
Според податоците, пак на министерството, 41 % од докторите работат во повеќе клиники како дополнителна дејност без разлика дали пациентите ги ставаат на листа за чекање. Информациите на министерството се земeни од повеќе бази и направени се компарации. Министерот вели дека има ситуации каде што доктори прегледуваат само еден пациент неделно, а некои дури и 100 пациенти неделно.
За жал ситуацијата е таква како што вие кажавте, имаме ситуации каде што доктори прегледуваат само еден пациент неделно, и имаме доктори што прегледуваат 100 пациенти неделно, и едниот и другиот се аутлајери. Така да мора да ги следиме и да направиме систем којшто прво реално ќе го следиме ние како министерство, второ ќе реагираме навреме“, изјави Алиу.
Засега не се знае дали лекарите ќе требаат да ги враќаат парите кои ги спечалиле со истовремено работење на неколку клиники, а со тоа ги оштетиле пациентите оставајќи ги на листите за чекање.
Министерот потенцира дека наишле на нелогични бројки и засега анализираат дали тоа е недостиг на законски решенија или лошо менаџирање. Има и доктори од внатрешноста што не направиле ниту една операција за цела година.
