Социјалистичката партија на Македонија ја истакнува определбата за чесно и одговорно работење на сите органи и институции во државата, се вели во соопштението од СПМ.
Еден од мотивите на партиското програмско работење, особено во последните 10 години, се законот, законитоста и владеење на правото. Впрочем во овој тежок период од тогашната одродена власт токму врз Социјалистичката партија на Македонија и нејзините најодговорни лица и пратеници се изврши најжестокиот притисок, политички прогон и планиран кадровски погром, за што партијата како никоја друга ја понесе својата жртва во целиот мрачен процес, со што само се зацврсти нашата верба во правдата и законот.
Оттаму нашите очекувања од новата демократска власт се во воспоставувањето на владеење на правото и на правната држава, но и во одговорноста во работењето на секој поединец или институција.
Истовремено Социјалистичката партија на Македонија жестоко реагира од нападното партиско етикетирање на актуелни случаи со сериозни обвиненија и тенденциозното објавување фотографии со кои се гази врз човековото достоинсво, а за што од одговорните е потребно издржано објаснување.
Социјалистичката партија на Македонија ги повикува надлежните институции да постапуваат според закон, одговорно и без селективност да ги превземаат сите активности во разоткривањето на било кој случај за кој постојат основани сомненија за сторен криминал или злоупотреба на службената должност. Почитувањето и примената на законот исклучува селективност или пристрасност и обезбедува праведност.
