Почна распределбата на ваучерите за набавка и вградување инвертер-клима уреди за граѓаните што стекнале право по јавниот оглас за 2025 година. Од денеска до 17 април 2026 година, лицата што се наоѓаат на списокот ќе може да ги подигнат ваучерите во меѓуопштинските центри за социјална работа во општината во која живеат.
Ваучерот овозможува набавка и вградување инвертер-клима уред со моќност од 3,5 киловати и најмалку енергетска класа А+, а може да се искористи најдоцна до 15 октомври годинава. Вредноста на ваучерот изнесува до 28.000 денари, без дополнителна доплата од страна на корисниците.
На веб-страницата на Министерството за енергетика, рударство и минерални суровини (МЕРМС) објавени се сите детали за потребната документација и постапката за подигнување, како и списокот на компании со кои се склучени договори, со што граѓаните ќе може да ги набават инвертер-клима уредите користејќи го ваучерот.
– Станува збор за втора фаза од веќе завршената постапка, во која право на поддршка имаа исклучиво домаќинствата кои најдоцна до 5 октомври 2025 година поднеле барање, доставиле комплетна документација и ги исполниле условите утврдени во програмата за заштита на ранливи потрошувачи на енергија – информира прес-службата на МЕРМС.
Списокот на граѓани што стекнале право, како и списокот на компании, се достапни на веб-страницата на Министерството: https://energy.gov.mk/mk-MK/odnosi-so-javnost/rezultati-i-spisoci
Министерството нагласува дека оваа фаза се однесува исклучиво на граѓаните што веќе аплицирале во 2025 година и претставува финализација на постапката во рамките на која се доделуваат вкупно 4.070 ваучери.
– Со оваа мерка државата продолжува со конкретна поддршка на ранливите категории граѓани,обезбедувајќи пониски трошоци за енергија и повисока енергетска ефикасност во домаќинствата – информира МЕРМС.
