Десет дена по трагедијата во Карпош, во која животот го загуби Ивана Јовановска и нејзината малолетна ќерка, Обвинителството поднесе обвинение против нејзиниот сопруг за три кривични дела: телесна повреда како продолжено дело на семејно насилство, загрозување на сигурноста и наведување на самоубиство и помагање во самоубиство. Според обвинението, трагедијата не била изолиран чин, туку крај на подолг период на насилство, закани и целосна психичка исцрпеност.
Изнесувајќи детали кои му претходеле на трагичниот настан од 2 март, од Обвинителството наведуваат дека истиот ден обвинетиот на повеќе локации во Скопје телесно ја повредил својата сопруга. Ивана побарала сама да се качи во станот со ќерката за да се спакува и да замине, но тој инсистирал да оди со неа и продолжил со заканите. Свeдок го оттурнал и го извел пред зградата, но според Обвинителството, до тогаш таа веќе била доведена во тешка психичка состојба, со страв, безнадежност и чувство на целосна безизлезност.
Во обвинението се наведува и дека обвинетиот издејствувал Ивана во 2022 година да му го отстапи со договор за дар својот идеален дел од станот во кој живееле заедно со нивната малолетна ќерка, со тоа што оштетената и детето требало да останат да живеат тука.
Откако официјално стекнал сопственост над станот, обвинетиот почнал психички и физички да ја малтретира својата сопруга, што особено земало замав во 2025 година.
Поради опасност од бегство, скопското обвинителство до Основниот кривичен суд Скопје доставило и предлог за продолжување на претходно одредениот притвор за осомничениот.
