Министерот за транспорт и врски Александар Николовски на министерски состанок во Вашингтон ги информирал колегите министри за, како што вели, градежната офанзива што во моментов се реализира во Македонија.
Според Николовски, државата спроведува инвестициски циклус вреден неколку милијарди евра, насочен кон развој на автопатската и железничката инфраструктура, особено на двата паневропски коридори – Коридор 8 и Коридор 10.
„Реализираме огромен инвестициски циклус од неколку милијарди евра, ги развиваме автопатите и железницата на двата коридори“, наведува министерот во објавата.
Тој посочува дека во тек е изградба и модернизација на повеќе автопатски делници, како и инвестиции во брза железница на Коридор 10 и железничко поврзување кон источниот дел од државата.
Воедно, со поддршка на Светска банка се работи и на модернизација на граничните премини со Албанија и Бугарија.
Николовски информира дека во соработка со партнери од Обединетото Кралство се планира и изградба на брза железница со брзина до 200 километри на час за патнички сообраќај и до 120 километри на час за товарен транспорт.
„Ја градиме Македонија“, порачува министерот во својата објава.
