До крајот на неделава се очекува сите македонски граѓани кои се наоѓаат во земјите на Блискиот исток, да бидат евакуирани. За Владата и МНР нивната безбедност останува да биде апсолутен приоритет. Во наредните денови се очекува да пристигнат уште два авиона со македонски државјани од Дубаи, а министерот Муцунски појасни дека први на листа се мајки со деца, туристи и странски државјни во специфични околности.
„Прво жените и малите деца, имаат приоритет. Приоритет имаат и тие кои што од причини за туризам биле заминати таму, немаат постојан престој. А од неколку држави имавме замолница билатерлано да излезме во пресрет заради одредени специфичности со тие граѓани кои се наоѓале во такви специфични категории“, изјави Тимчо Муцунски, министер за надворешни работи и надворешна трговија.
Во Доха досега се регистрирани 162 лица, од кои 89 изразиле подготвеност за евакуација. Во Кувајт се пријавени 36 лица, во Бахреин 15, а во Саудиска Арабија уште петмина. Четрнаесет лица кои претходно се пријавиле за евакуација не се пријавиле на аеродромот во Дубаи, а за да се пополнат празните места, биле повикани други граѓани кои биле на листата на чекање.
„Вчера на аеродромот во Дубаи четиринаесет лица кои што барале до последен момент евакуација одлучиле да не се појават. Среќа имавме подготвено план за таква ситуација, имавме таканараечана листа на чекање и нашата амбасадат во АБУ ДАБИ, веднаш контактираше со група граѓани кои беа подготвени да дојдат“, изјави Тимчо Муцунски, министер за надворешни работи и надворешна трговија.
Досега од Израел се евакуирани шестмина со владиниот авион и уште толку со комерцијални летови. Целиот транспорт е бесплатен, односно го покрива државата. Муцунски изрази жалење што во целата операција, дел од медиумите пласирале непроверени информации и дезинформации во чувствителен момент за граѓаните. Предупреди дека со ширењето на лажни вести се создава непотребна паника и се поткопува довербата во институциите, а истовмремено се урива и меѓународниот углед на државата.
