Македонската економија е стабилна и се движи во добра насока – градежништвото и инвестициите се главните двигатели на растот оваа година, оценуваат економските експерти.Растот од 3,8 проценти во третиот квартал лани, според податоците на статистика, не е изолиран случај, туку сигнал дека економијата постепено зајакнува. Зголемената активност во градежниот сектор, новите инфраструктурни проекти и поинтензивните јавни и приватни инвестиции внесуваат свеж капитал и отвораат работни места. Според анализите, токму инвестициите се клучниот фактор што ја одржува позитивната динамика и создава основа за понатамошен раст..
Универзитетскиот професор Синиша Наумоски е оптимист дека, и покрај ризиците од глобалните економски текови, домашната економија има стабилни темели.
Наумовски оценува дека пазарот на труд во земјава влегува во постабилна фаза. Според најновите податоци на Државен завод за статистика, стапката на невработеност се намалува и достигна 11,4 проценти што е значителен пад во однос на претходната година. Тој вели дека намалувањето е резултат на зголемените инвестиции, растот во градежништвото и индустријата, како и активните мерки за вработување.
Според најновите податоци на Народната банка, економијата расте со солидно темпо. Во третиот квартал лани е забележан раст од 3,8 проценти – малку повеќе од очекуваното, а прогнозите се дека позитивниот тренд ќе продолжи.
Инфлацијата во 2025 година во просек изнесува 4,1 процент и е во рамки на проекциите, додека девизните резерви се на високо ниво…
Што се однесува до пазарот на труд, во земјава има нешто над 91 илјада невработени, а работа имаат речиси 710 илјади граѓани. Повеќе од половина од невработените се мажи 57,9 проценти, додека 42,1 процент се жени.
Ања Лукарова
